সাধেৰ ভোমোৰা উড়িয়া । Sader bhomora uriya
ও ৰে কায় সে কেৱা ফুলেৰ মধু নাই
ও ৰে ফুলেৰ যখন মধু ছিল
ভোমোৰাৰ আনাগোনা
ফুলেৰ এলা মধু নাই
ভোমোৰাও আসেনা
ও ৰে গাবুৰ বয়সে সেই নাৰীটাৰ
স্বামী নাইৰে ঘৰ
মিছা মিছি ৰান্দন বাঢ়ন
মিছাৰে সংসাৰ
মনেৰ যত গোপন কথা
খুলিয়া কবাৰ চাং
কায় শুনিবে মনেৰ কথা
মানুসেই নাপাঙ
সাধেৰ ভোমোৰা উড়িয়া পৰিল ঠাই ঠাই।
2. বৃক্ষ শিমিলাৰে গগনে । Briksha shimilare gagane
বৃক্ষ শিমিলাৰে, গগনে মেলে ডাল
নাৰী হয়া ৰসেৰ যৌবন
ৰাখিম কতকাল
পাহাৰে কান্দে মালঘুগৰা ৰে
ও ৰে চিত যাওং যাওং কৰে
পৰাৰ পুৰুষ পদ্মেৰ ফুল
সদায় মনত পৰে
বালু তিল তিল পঙ্খী কান্দে
বালুতে পৰিয়া
মুই অভাগী নাৰী কান্দং
এ যৌৱন বান্দিয়া
ও ৰে ভৰিয়া গেইল পানী
মনে কয় উৰিয়া যাং
পাঙ্খা নাই দেয় বিধি।
3. মোৰ পায় বা ঘুগুৰা । Mor pai ba ghugura
আই মোৰ পায় বা ঘুগুৰা বাজে ৰে
আই মুই কেমনে বাইৰা যাং
ঘৰে মোৰ শশ্বৰ, দুৱাৰত মোৰ ভাসুৰ ও
ও মোৰ শিয়ৰে ননদী জাগে
আই মুই কেমন কৰিয়া বাইৰা যাং
আই মুই পীৰিতিৰ আশে
পীৰিতিৰ বাদে
ঘুগুৰা বায়না দিনু
আৰে না জানিয়া ৰসিয়া বানিয়া
ঘুগুৰাত কালাই বা ভৰেয়া দিছে ৰে
ও মুই ঠাসিয়া ধৰং চিপিয়া ধৰং ও
মুই আস্তে ফেলাং ৰে পাও
আৰ জলেৰ কলস কাঙ্খে নিয়া ও
আই মুই নদীৰ ঘাটে যাং
আই মোৰ পায় বা ঘুগুৰা বাজে ৰে।
4. আৰি ও মইষাল
মইষাল দাফাদাৰ ভাই
ডালা সাজাও ডালা সাজাও
চল মইষেৰ বাথানে যাই মইষাল ৰে
দুধ খোৱাইলেন সেৰে সেৰে ৰে
ও মইষাল দৈ খোৱাইলেন হাড়ী
মুইনা হইচং মইষাল ৰে
ও মইষাল অল্প বয়সেৰ আৰী
আমাৰ বাৰী যান মইষাল ৰে
ও মইষাল বইসতে দিব পীৰা
খাইতে দিবো দৈ চিৰা
আৰো গুৱা পান মইষাল ৰে
তোলা মাটিৰ মালভোগ কলা ৰে
ও মইষাল বন্নি ধানেৰ খৈ
শাইল ধানেৰ চিকন চিৰা
গামছা বান্ধা দৈ মইষাল ৰে
গৌৰীপুৰেৰ গুৱা মইষাল ৰে
ও মইষাল গোলকগঞ্জেৰ পান
নিগম দুপৰা বেলা আসিয়া
খায়া যান মইষাল ৰে।
ConversionConversion EmoticonEmoticon